मोठी बातमी,
उत्तरकाशी बोगद्यातील ४१ कामगारांची सुटका,
बचावकार्य मोहीम यशस्वी, विदेशी तज्ज्ञाचं सहकार्य
मिररवृत्त
उत्तरकाशीतील सिलक्यारा बोगद्यातील कर्मचाऱ्यांच्या बचावमोहिमेला मोठं यश आलं आहे. सर्व ४१ कामगार बोगद्या बाहेर आले आहेत. या मोहिमेतील अरनॉल्ड डिक्स यांची भूमिका महत्त्वाची होती.नवी दिल्ली : उत्तराखंडमधील उत्तरकाशी येथील सिलक्यारा बोगद्याचं काम सुरु असताना भूस्खलन झाल्यानं १२ नोव्हेंबरपासून ४१ कामगार आत अडकले होते. या बोगद्यात अडकलेल्या कामगारांना बाहेर काढण्यासाठी सर्वतोपरी प्रयत्न सुरु होते. उत्तराखंड सरकारनं कामगारांच्या सुटकेसाठी युद्धपातळीवर प्रयत्न सुरु केले होते. उत्तरकाशीतील सिलक्यारा बोगद्यातील सर्वच्या सर्व ४१ कामगारांना बाहेर काढण्यात आलं असून बचावकार्याला मोठं यश आलं आहे. १७ व्या दिवशी ही बचावमोहीम यशस्वी ठरली आहे. अमेरिकन ऑगर मशिनच्या सहाय्यानं ६० मीटरच्या अंतराचं खोदकाम सुरु करण्यात आलं होतं. या कामागारांच्या सुटकेच्या मोहिममध्ये जिनेव्हा येथील इंटरनॅशनल टनेलिंग अंडरग्राऊंड स्पेस असोसिएशनचे प्रमुख अरनॉल्ड डिक्स यामध्ये सहभागी झाले. अरनॉल्ड डिक्स हे मूळचे ऑस्ट्रेलियाचे आहेत.
अखेर १७ दिवसानंतर कामगार बाहेर
सिलक्यारा बोगद्यात अडकलेले ४१ कामगार सुरक्षितपणे बाहेर आले आहेत. गेल्या १७ दिवसांपासून सुरु असलेल्या बचावकार्याला मोठं यश आलं आहे. बचावकार्यावेळी मंत्री वी.के. सिंग आणि मुख्यमंत्री पुष्कर धामी उपस्थित होते. या बचावकार्य मोहिमेमवर पंतप्रधान नरेंद्र मोदी हे लक्ष ठेवून होते. तर, काँग्रेसनं बचावपथकाचं अभिनंदन केलं आहे.
अरनॉल्ड डिक्स यांनी आज सकाळी बचावकार्य यशस्वी होत असल्यानं समाधान वाटत असल्याचं म्हटलं होतं. ऑगर मशीन ४८ मीटरपर्यंतचं खोदकाम केल्यानंतर बंद पडली होती. त्यानंतरचं खोदकाम रॅट होल मायनर्स यांच्याकडून करण्यात आलं.
अरनॉल्ड डिक्स हे या मोहिमेत २० नोव्हेंबरपासून सहभागी झाले होते. अरनॉल्ड डिक्स हे इंटरनॅशनल टनेलिंग अँड अंडरग्राऊंड स्पेस असोसिएशन, जिनेव्हाचे अध्यक्ष आहेत. मात्र, त्यांच्याकडे भूगर्भशास्त्र, अभियांत्रिकी आणि कायदा विषयाच्या पदव्या आहेत. त्यांनी विज्ञान आणि कायदा विषयाची पदवी मोन्साह विद्यापीठ मेलबर्न येथून मिळवली आहे.अरनॉल्ड डिक्स हे गेल्या ३० वर्षापासून या क्षेत्रात कार्यरत आहेत भूमिगत सुरक्षेसंदर्भातील कामांमध्ये त्यांनी महत्वाचं योगदान दिलं आहे. कतार रेड क्रिसेंट सोसायटीशी ते २०१६ ते २०१९ दरम्यान संबंधित होते.
अरनॉल्ड डिक्स यांचा प्रार्थना करतानाचा व्हिडिओ व्हायरल
अरनॉल्ड डिक्स यांचा सिलक्यारा बोगद्याबाहेर प्रार्थना करतानाचा व्हिडिओ व्हायरल होते. ऑगर मशीनद्वारे खोदकामात अडथळे निर्माण झाल्यानंतर रॅट मायनर्सकडून खोदकाम सुरु करण्यात आलं होतं. त्या दरम्यान अरनॉल्ड डिक्स यांचा एक प्रार्थना करतानाचा व्हिडिओ समोर आला असून तो व्हायरल होते आहे.
